I tan tunge A nih

Ngaihtuahna nasa tak senga mitthlaa lolang riai riai, miten hmu ve se ti a kan duh tak mai pencil leh lehkhapuan la a, kan suangtuahna te mawi tak mai a chhawpchhuak thintu Lemziak thiamte hi an hlu ngawt mai. An thawhrimna zarah liau liau Siamtu kutchhuak mawi tak takte pholanin a awm thin a, thil hlu ni a kan hriat ngailohte hlutna kan thinlungah an tuh thin a ni. Chu chuan ngaihsakna thinlung min pein a enkawl zui tura hringmite mawhphurhna pawh min hriat chhuahtir thin bawk. Thil mawi leh mi hip thei, mi duhzawng leh duhawm te hi Lemziak thiamte kuthnu a ni thin a ni. Mahse… Siamtu thilsiam mawina leh parvulna ringawt hi Amah Siamtu kan hriat telloh chuan ala chuai dawn a ni. Khawvel parvulna leh chu parmawina chen tu te ngei chu an la chuai dawn a ni.. Chung zawng zawng chungah chuan mawina zawng zawng infawkkhawmna leh duhawmna a khat thil pakhat a awm a chu chu kan Lal ISUA KRISTA hi a ni. A sulhnu a hnutchhiah leh a pianhmang te chu Lemziak thiam tamtak, tun thleng a an chanchin la rehlo te pawhin mawi leh uluk takin an ziak a ni. Thianghlimnaa khat, Thatna leh Felna zawng zawng neitu, Sawisel kailo, Khawngaihna leh Hmangaihna sangber neitu chu engang taka duhawm ni ang i maw! Lemziak thiam i ni a, ISUA KRISTA hi i tan tunge a nih ve le?

Lungpui chunga in, fur khawchhiat ruah sur tluk tluk laia tuihawk nasa tak lo luang dum dum in a tihchhiat theihloh satu pa kha pa va fing tak a va ni em. A finna chhan ber chu tunlai tawng takin a in sakna tur a foundation a thlang thiam a ni. Vaivut chunga in erawh chu furkhat pawh a daih lo. A building chu pawn lam atang chuan alang mawi ve fu a mahse a tak takah chuan belhchian alo dawl lo ngang mai. Ruah a lo sur a thlipui a lo thawk a, tuihawk nasa taka a lo luan meuh chuan hnuai lam atangin zawi zawiin kua alo hreuh a. A foundation a ngheh loh miau a vangin a tawpah a chim ta rup a ni. Tungchhova kal mihringte hian ‘A kila lung pawimawh ber’ hi kan nun foundation ah kan hmang lovang tih a va hlauhawm em! Tisa lam ah kan sang tial tial ang a, kan nun innghahna a bul a ngheh miau loh chuan kan nghing nasa tawlh tawlh ang a, a tawpah kan chim ve rup mai ang tih a hlauhawm a ni. Chuvang chuan kan nun bulthut hi Chatuan Lungpui nghet ISUA KRISTA-ah innghat sela a va tha dawn em. Chumi hnuah chuan i nun chu skyscrapers ang maiin chhawng tamtakin i remchho anga, i sang tial tial ang a midangte tan i hmuhnawm tawlh tawlh dawn bawk a ni. Engtikah mah i chim ngai lovang. A kila lung pawimawh ber ISUA KRISTA hi kan Engineer leh Architect te hian kan nunah engtiang taka pawimawh nge kan dah le?

Ram siamthatna tura ngaihtuahna senga tha leh zung tamtak seng tute pawhin kan hriat tur chu kan ram a dinchhuah nan hian eng hi nge kan hmachhuan tur tih hi a ni. Khawvel mihring thiamna – Central Services kan nihna, IIM, IIT leh India ram leh Foreign-a college tha ber ber a management leh Engineer thiamtak a zirchhuak kan nihna te, a nih loh leh Phd, Mphil. turu tak tak kan nihna te, Presidency leh Xavier’s college vel atanga kan thiamna puakchhuah te hi kan ram Mizoram siam thatna bulpui ber a ni hauh lo. Chung zawng zawng aia pawimawh hmasa chu PATHIAN THU hi a ni. Tunlai in ram siamthat duhtu anlo pung ta zel a, a chang chuan kan experience leh thiamna kan neihte hi kan tawrktarh nasa lutuk em aw tihtheih turin thil alo awm thin. Nie…a dik alawm, Japan ram te, communist Russia leh China ramte pawh an thawhrimna leh thiamna avangin ram hausa ber berah an inhlangkai a. Pathian tihtu chu sawiloh a thente chu Kristiante tiduhdahtu ram an ni zawk si. Enge a chhan ni ta ang le? Anni ho hi i entawn em ni? Anni ho chu ‘Fa’ nihna neilo ram an nia sin. Keini erawh Pathian fa kan ni a, kan bultanna chu kan Pa duhdan atangin a ni tur a ni a, anni nen intehkhin thei kan nilo. Pathian hian kan thawhrimna leh hriatna avang hian malsawmna tamtak he khawvelah hian a dah a, mahse Amah ringtute tan chuan A ram leh a felna zawng hmasa phawt turin min phut tlat. Chumi hnuah chuan kan thiamna te Pathian tih chung leh A duhdanin kan hmang ang a, Pu Rokunga raltiang ram chu kan thleng ngei ngei dawn a ni. Mifel sawm lek pawh awmse boral mailo tur khawpui ropui tak kha a chhungah mifel sawm an awm tlin miauloh avangin tihboral a ni. Ram hruaitu, Mizoram leh Mizo hnam dinchhuahna tura tha leh zung tamtak sengtu leh sen huamtu i ni a, ram siamthatna atan hian ISUA KRISTA hi eng tiang taka pawimawhah nge i dah le?

Vawiin chu ka birthday a ni a Mc Donald emaw KFC-ah emaw tal dinner ah ei ang aw engatinge kan tih thin le? Chaw leh chawhmeh tui tak, a siamtuin thiam taka mai bawlhlo tha tha nena chawpawlh ei kan duh vang a ni. Tlemin aman lo to deuh mahse a tuina nena chhut chuan kan lung a awi em em a ni. Mizo chawhmeh ah pawh Bai siam thiam te phei hi chu an hlu ngawt mai, a bai pawlh tur bawlhlo eng eng emaw nen an han chawhpawlh a, tuitak maia an siam kha kan lo eipui ve a, kan va puar thin tak em! Chu chuan thiam tak leh tui tak maia chaw leh chawhmeh siam thintu te hlutzia min hrilh a ni. Tisa lamah duhtawkin minlo hraipuar thin a lo ni. Chumi piah lamah chuan kan taksa mai nilo kan thlarau damna tur thil pakhat a awm a, chu chu Amah ngeiin min hrilh ‘Nunna chhang’ a ni a, tuihal te tan pawh chatuana kang lotur ‘Tuinung lui’ a ni. Riltam te tan riltam tawhlohna tur nunna chhang a ni a, hetui in apiang te hi an tui a hal leh ngai tawhlo bawk. Tisa lama kan pasal fanaute hraipuara, an ei leh in tur tui tak tak te hlui thintu te hian Nunna chhang hi i offer telve thin ang u. Chhungkua a nu ber te u, ISUA KRISTA hi kan chhungkaw tan hian engtiang taka pawimawhah nge kan dah le?

Vawi khat chu Mission Veng, Aizawl-a Masihi Sangati (khatih laia Non-Mizo Christian Fellowship) crusade-ah hian ka Inkhawm a. Kan Inkhawm lai chuan ngaihtuahna hrang hrang ka rilruah alo lut a. Thusawituin thiamtak maiin thu a sawi a ngun tak maiin an ngaithla a, mahse engtiang takin nge an naupan tet ata an sakhaw lo vawn tawh an kalsan theih mai ni ang le? Thusawitu thusawi ringawt atang chuan chu chu ava har duhawm ve! Mahse ka rilrua lo awm ta zelah chuan Thlarau Thianghlim hnathawhna zarah thusawitu thusawi te kha an thinlungah lo lutin hna a rawn thawk a, chu chuan enna alo pe thin zawk a lo ni. A chang chuan tlema kan thusawi alo that deuh changa Inkhawm bana I sawi tha hle mai ti a min han chibai sap sap hi chuan ka theihtak emaw ti a han hawisan vah mai pawh thil awltak a ni ve khawp mai. E, ani chu chumi hmun atanga zirchhuak a ni a, a zirna hmun pawh India ramah chuan a tha pawl a ni a, Thuthlunghlui zirna ah phei chuan Mizo te zinga kan hmatheh ber a ni. Tin, amah hrim hrim hi mi bright tak a ni bawk … tihte hi Kohhran miten kan rawngbawltute kan tehna tur a ni berlo. Rawngbawltu, a thingthit a vantawng hi Kohhran miten kan mamawh. Chumi dawtah chuan kan thiamna in hna a thawk tan dawn bawk a ni. Kan rawngbawlna hi ISUA KRISTA minlo tiam Thlarau Thianghlim tello chuan a hlawhchham zel dawn a, mihring taka kan beihna ah chuan kan hahthlawn mai mai dawn a ni. Kan rinna siamtu leh tifamkimtu a nih avangin A tello chuan penkhat kan pen pawhin awmzia a nei ngai lovang. Pastor, Missionary, Kohhran Upa leh in Kohhran Thalai hruaitu i ni a, i rawngbawlna ah hian ISUA KRISTA hi engtiang tak pawimawhah nge i dah le?

Lalpa, tunah zawng a uih tawh ang, a thihna ni li a ni tawh si a ti a Marthi-in Isua a chhan lai khan ‘Min Chhandamtu hi tunge a nih a la hrechianglo a ni maithei e. Mahse ni li lai a liam tawh hnu pawh a Lazara te khua a thlen hun pawh a huntak la ni theitho khan phelh ula, kal tir rawh u a’n tih meuh chuan thihna chunga roreltu a ni tih ava chiang em! Damlo tana ka tawngtaina hla pakhat chu, Aw, LALPA, kan taksa zawng zawng design tu i ni a… tih hi a ni. Kan taksa a diklo leh fello lai te hre vektu chu kan taksa design tu hi a ni. Midang an awm lo. Ka duh e lo thianghlim tawh ang che a tih chuan phar natna khan kha damlo chungah khan thuneihna a nei tawh lo. Tidamtu ISUA dungthula tihdamna hnathawk mektu te tan heihi chona a va ni em! Kei LALPA a tidam tu che ka ni titu nghenchhana tihdamna hnathawh hi a lo awlsam ber dawn alo nih hi. Mi pakhat thusawi ka hriat reng chu Mizo Doctor pakhat hian damlo enkawl tur a nei a, damlo chhungte chu Pathian hnenah a damna dilin an lo tawngtai laih laih a. Chu Doctor chuan khawnge, Pathian tel miah lovin ka’n enkawl a nge ( an thusawi dan ang chiah chiah chuan ka ziak lo) a lo ti a ni awm e. He Doctor thusawi tunthleng hian ka rilru a tina hle a ni. AIIMS, JIPMER, Lady Harding college adt. vel atanga kan zirchhuahna te hi tihdamna hna kan thawhna ah hian hmanrua berah kanlo hmang palh ange. Nge…India rama damdawiin lian tamtak leh Doctor/Nurse thatak tak te pawhin tawngtaiin Tidamtu hi an au ngai chuang lova, mahse an damdawi pek te chuan mi sang tamtak an tidam tho si a, chubakah Damdawi siamtu company lar Dr Reddy’s Lab ngei pawh ringlo tu hmuhchhuah a ni a, an damdawi te chuan mi tamtak natna a tidam tho a ni tiin i rilru a lo inzawt a mi? A nih chuan nang ringtu chuan anni ringlo tu chu i va awt in intehkhin i duh tihna a mi? Ringtute tihtur leh ringlote tihtur chu phek khatah a chuang ho thei lova, keini chu Chanchintha avanga danglam tawh kan ni a, ringlo te nena nghawngkawl bat ho thei kan ni tawh lova ni. Tawngtaina nena paracetamol mumkhat i patient a eitir chuan tawngtaina chhangtu PATHIAN ropuizia i hmu ang. Tihdamna hnathawktu Doctor/Nurse etc i ni a, i hnathawhna ah hian engtiang taka pawimawhah nge ISUA KRISTA hi i dah le?

Engtik laiin nge a lo zir thin tih tumah ina an hriat ngailoh Juda te dan bu Torah hrechiang em em mai, Synagogue-a naupangte a nih laia Puithiamte pawhin he naupang chu mi danglam tak a nih hi an tih thin ISUA KRISTA kha Zirtirtu ropui Rabbi tiin an ko thin a ni. Khatih hun laia zirtirtu ropui tak tak te leh khawvel awptu Rom mifing te kebula seilian nilo mahse ngaihsan a hlawh na ngiang mai. A chang phei chuan riltam hrelo leh chawei hun theihnghilh thakin mipuiten a zirtirna an ngaithla thin tih mipui sangnga hraiah te khan kan hmu a ni. Eng method nge, eng philosophy nge a hman chu hrelo mah ila mi rilru hneh thei zirtirtu ropui, a aia ropui awm leh thei tawhlo a ni tlat a ni. Mithiam tena zirtirtu tha quality an sawi thin A good teacher teaches, a great teacher encourage, the best teacher inspire tih han chhiar chiah hi chuan Lal Isua khan heng quality zawng zawng hi a nei kim vek tih ngun taka i ngaihtuah chuan i hrethei ang. I naupangte hmakhua ngaia zirtirna tha leh finna thuruk i pek duh chuan ISUA ke bulah tlulut mai rawh. ‘School of knowledge’ tam tak a awm laiin khawvel khawi hmunah mah hian ‘School of Wisdom’ hi a awm ngai lovang. Finna leh remhriatna hi hriatna (knowledge) atanga neih a ni ngawt lova, LALPA tih tute tana siam a ni. Kan Lalpa chuan thuneihna nen zirtirna a pe thin a chu chu hmangaihna in a hlenchhuak thin a ni. Nie, Amah hi zirtirtute Zirtirtu chu a ni. Zirtirtu ropui nih kan duh a, kan zirlai naupangte inspiration pek kan duh kan nih chuan a hniakhnung hi zui ila kan tifuh ber dawn a nih hi. Zirtirtu, nitin a naupangte nuna thiltha tuh duhtu kan ni a, kan hnathawhna ah hian ISUA KRISTA hi engtiang taka pawimawhah nge kan dah le?

Khawvel hi a changkang chak i ti em? Hmasawn na hi nitin kan hmuhtheih ah a awm ni mai hian a hriat a ni. Chutih rual chuan kum reilo te kal ta a kan nundan te kha han chhuikir hian a lo thing hma khawp mai. Tun ang hun, Facebook leh Twitter lar chhoh vanglaia chat nan Mirc kan hmang thin a ni tih thangtharte bula sawi chu a zahthlak lek lek zawk ta mai. Floppy drive siam chhuaktu te khan a hunlai kha chuan ropui an inti ve ngawt ang le, mahse tunah tumahin an hmang tawh ngai silo. Ni e, khawvelah hian thilthar a lo chhuak zel a, mathei lovin kan tunhun hi alo la thing dawn a ni. PATHIAN zara kan dam zel chuan kan tu leh fate pawhin kapu, in vanglai hian inlo la thing angreng hle mai, enteh in thlalaka in posi te hi, in camera hmante hi a thatawklo a nih hi … tiin nuihza siam nan tak minla hmang maithei a ni. A nih chuan khawiah nge khawvel finna chu? Kum reilo te a midangin heihi a dik tawk lo a ni, kan pi leh pute lo hmuhchhuah hi alo la famkimlo hle mai tih kan hlawh zel si chuan mihring hriatna leh finna chu a va ho si ve. Thang leh thar zelte hi keini aiin an thiam zawk a ni tihna a ni ringawt lova, famkimlo mihringte hriatna chu khawvel tawp thleng pawhin a famkim dawn chuanglo a ni. Arsi te khi a hun biah i hruai chhuak thei em ni? Zangkhua hote hi i hruai chhuak thei em ni? ti a chhan theihloh zawhna Joba hnena zawttu hi tunge a nih i hrechiang ang u. Mihring finna leh hriatna, kan hunlaia kan ngaihsan em em mai te nakin lawk a hluihlawn (obsolete) ni mai tur thiamna te hi lo welcome dan thiam a va tul em. Kan vanglai hun, hei bak bak a awm thei dawn em ni kan tih hun te kha chhuan thum vel a ral awrh ang a, mawl lai hun ah alo chang zel dawn a ni. Chu ai chuan…chung zawng zawng chunga roreltu, Van hnuaia thil engkim hi Ka ta a ni titu hi kan hriatna bulpui lo ni zawk rawh se tiin zirna runsang bel tu zawng zawng te ka sawm duh a ni. Khawvel thiamna hi Ama kutchhuak a ni a, A tello chuan i thu kha a ril thei lovang a,i hriatna kha chhawrtlak a ni hek lovang. Thiamna leh zirna runsang bel tu zawng zawng te u, in zirna ah hian finna bul ISUA KRISTA hi engtiang taka pawimawhah nge i dah le?

Khawvela sum dinhmun a tlakchhiat vanglai (recession) a ICICI bank tlukchhiat hlauhawmin a awm tih thu an than meuh chuan a tukah ATM kawtah an pawisa dahte a tam thei ang ber lakchhuah tumin nutling patling an ding khup mai a. An lakchhuah loh chuan an sum dahte kha an lachhuak theilo hlen mai ang tih an hlau ani. Khatih hun lai vek khan General Motors company, America chu sawiloh khawvel pum huap pawha company lian ber pawl, khawvel ram 157-a motor siama sumdawnna nei pawh tlukchhiat hlauhawm khawpin a ding a nih kha. Tsunami avanga Japan Nuclear reactor a chhiat rup lai khan Television Channel-a nu pakhat an kawmna ka hmu a, a ni chuan kan hruaitu te chuan 100% in he reactor hi a him ang anti, a ti a. Mahse 100% a mithiam ten a him ang an tih kha alo himlo a ni tih kan mit ngeiin kan hmuh kha, tuifawn leh thlipui avang khan nasa takin a chhia a, khawvel a ti mangang hman a ni. Khawvel ah hian dinghlen thei reng reng a awmlo a, dinghlen tur a awm bawk hek lo. Rohlu ka nei lawmna thuruk … tih hla sa thin tute hian engber hi nge kan rohlu chu? Sawrkar/Company-ah appointment thar i hmu a, i sum leh pai dinhmun a that chho deuh avangin chu chu i lawmna alo ni em ni? Contract nuai 100 chuang man i hmuh avangin khawvel hi i chhuk en ta mai em ni? A lawmawm e heng zawng zawng hi, mahse rohlu ber ISUA nei tel ngei ngei turin ka chah duh che a ni. I sum leh paite kha vanah, sulrul leh tui ekin a eichhiat ve theihlohna ah khawlkhawm tlat zawk rawh. Chutilochuan khawvel danglam zelin a lo eichhiatsak hlauh dah ang che. Hriatchian loh khawvel hi chuan mi bum hi a hmang a, nimina kan nuihna kha naktuka kan tahna a ni thei a ni. Chuvang chuan kan rohlu ber chu ISUA KRISTA ni sela, kan sum thuhrukna pawh hmuhtheih bank-ah ni lovin hmuhtheihloh bank-ah ni zawk rawh se. Kawla nichhuak chhiara rimtaka chhungkaw chawmtu i ni a, i eizawnna ah hian ISUA KRISTA hi engtiang taka pawimawhah nge i dah le?

Misualte tan ISUA KRISTA hi Pathian beramno khawvel sual kalpuitu a ni a, thatna reng neilo te tan kan felna a ni. Chaute hnena chakna pe thintu a ni a, thawkrim te tan chawlhna nuam a ni. Lei dan a thiam chang zo tawhlo te tan thiamchanna Kraws kan nei a, PA hmaa kan thiamthu min sawipui tu tur chu ISUA KRISTA hi a ni. Lungngaite tan thlamuantu a ni a, beiseibo tawhte tan khawvel nghahfak kan beisei MESSIA a ni. Keini Ringtute tan kan CHHANDAMNA a ni a, chatuana nunna kan neihna tura kan aia thi a tholeh ngei kha a ni. Chuvangin kei ka tan chuan ISUA KRISTA hi ka engkima engkim, ka nun hnarkaitu leh ka hmangaih chu a ni. ISUA KRISTA hi i tan tunge a nih ve le?

Krismas 2011 in Karimganj

Hyderabad atangin Karimganj, Assam-ah kumin october thla khan kan insawn a, kan Krismas hman hmasak ber thlalak tlem azawng ka'n dah ange. Kumin hian Upper Republic KTP ten Krismas min rawn hmanpui thei a, sum tamtak leh tha leh zung tamtak sengin programme thatakin an rawn tihlawhtling thei a, kan lawm takmeuh a ni. Krismas ni hian Pathianin ringlo tamtak Biakin ah leh Mission compound ah min rawn hruaikhawmsak thin a, kuminah pawh mi sang tamtak rawn pungkhawmin Pandal lianpui mai Rowlands Memorial High School tualah sain programme siam a ni a. Pathian thusawina vawi-4 vel zai leh lam karlakah neih a ni a, naupang te leh thalai etc. ten hun an nei bawk a. Tin, Biakinah pawh ringlo tamtak malsawmna dilin an tawngtai bawk a ni. An thu ngaihthlak leh an mithmuh zawng zawng te Isua Krista rinna kawnga hruaitu alo nih theihnan i tawngtaipui thin ang u.


Biakin kawtah mipui an pungkhawm

Pandal awmna leh Mission Compound inkar kalkawngah pawh an tam khawp mai

Ni 28-a KJS (kan thalai pawl ang hi) Bible track sem

Bible track sem

Karimganj Mission compound ruaitheh, Ni 26 December

Krismas 2011@Karimganj

Upper Republic KTP band

Upper Republic KTP special Item

Compound naupang ten Krismas drama an chang mek

Kan nupa in Ranin kan siam ah

Kan nupain Biakin chhungah

Chhingmit intawng chu

Rawllai ka ‘d’

Mihring kum chhiarnaah chuan alo rei ve ta hle mai kan tleirawl lai hun te kha. Belpui vala val ve ta na na na chuan duhte kanlo tawng ve a. Ni e, khatih hun lai khan ‘hmangaih’ ka tawng ve a ni. Ka ngaihzawng ti satliah lovin ka ‘d’ tiin ka ko hnap thin a, ka tan khuavel a ti parmawi thin! Kan ‘nih’ tan dan pawh ho te a ni. Vengkhat kan ni a, kan in pawh inhlat lote a ni. A u te nen phei chuan naupan lai atanga inkawm thin kan ni a.

Amah hi kei aia a naupan deuh avangin nau enin ka en thin. Mahse…zan khat chu tuikhurah tui kan chawi a (khatih hun lai khan kan khua hian PHE tui connection kanla nei ve lo), keini tleirawl kha chuan tin khat hi kan kawt zo chiah lova, a chanve aia sang deuhte kan kawt a. Kan tui chawi hawlam chu kan thian hovin hmun pakhatah kan chawl a, kan chawlh atanga rei vaklo ah chuan ka thiani te pawh an tuichawi hawlam an rawn thleng ve a.

Lo chawlve tura kan tih chuan anlo chawl ve mai a. Tlema kawngpui atanga piah deuhvah kan thukhawm laih mai a, amah hi a hma pawha kalo mitmei ruk thin leh ka thiante hnenah pawh ka sawi thin avangin nakinah chuan ka thiante chuan ka rilru hria niawm takin ‘chance’ min pe ta a ni. Tichuan chumi zan atang chuan ‘d’ kalo nei ve ta. Hmangaih lehkha kan inthawn dan leh kan inkar a kip akawi chu sawilo mai ila, mahse sawi hmaih phal miahloh chu Inrinni tlai inbual fai zawh ver vawra ka ‘d ‘te inbula han len kha a ni. Ka hmuhturin pawnah a rawn chhuak ngei thin a, ava nuam thin em!

Tuantul vangin Zawlkhawpuiah

Kan khuaah vanneihthlak takin Matric ka pass a, science subject lak ka duh avangin kan khuaa zirzawmna awm ta silo chu Aizawl khawpui lamah kal a ngai ta. Matric ka pass kan lawm ni a ka ‘d’ hlimzia leh Zawlkhawpui ka pan dawn zana a hmel te chu lei leh van ang hlauh a ni. Mahse kan pahnih atan a that zawk tur zia hrilhfiah chungin inngai tak chungin Aizawl ka pan san ta a. Kan khua hi kala chhuahsan ngai vakloh avangin Aizawlah hmelhriat mumal nei talo chu ka lung a leng thin kher mai. Hun erawh a kal liam duak duak a. Mahse mihring hi alo mak a nih hi, thla tam a liam hmain lehkha kan in thawn tlem tial tial a. Thla riat vel naah chuan ka ‘d’ lehkha hmuh tur a awm tawhlo. Chutiang bawkin keipawh Aizawl ka thlen thlak tirha lehkhathawn ziah ka peih ang a ni ta derlo mai. Ka Hmangaihna a chuai ta em ni?

Lam ang kalo let leh ta

Kumkhat dawn kan khuaa haw lova ka awm hnuah chuan nikhat chu hawna hun remchang ka hmu ta hlauh mai a. Inrinni tlaiah kan khaw Bus-ah ka thuvang mai a, tlai dar 5 velah kan khua him takin Pathian zarah kan thleng a ni. Ka thlen veleh chuan ka thiante ho pawh an rawn leng sap sap a, an thu hriat chak pakhat ka ‘d’ nena kan chanchin min zawt a. Mahse chhan ngaihna vak ka hrelo, lehkha pawh kan inthawn ngai tawhloh thu leh kan ‘nih’ tawh loh thuin ka chhang mai a.

Chawte ka’n eikham a, hemi zan atang hian kan khua naupang Sunday School Inkhawmpui Venglai BiakIna a awm dawn avangin kan thian ho pawh Inkhawm turin kan inau khawm a. Tan hma hretin kan thleng a, BiakIn chhung chu a lokhat vek tawh mai a. Keini chu BiakIn hnung Pulpit chung zawn lama Balcony-ah kan thu a. Mipui ep zawnga kan thut bakah tlar hmasa berah kan thu si a, kan lang chiang kher mai.

Chhingmit a intawng

Inkhawm kan tan a, tan atanga rei vaklo ah chuan hmeichhe thutna lampang tlar laiah chuan ka ‘d’ (hlui) ngei mai thu ka zu hmufuh ta. Ka zuk en a a ni chuan a hma tang khan minlo hmuin minlo en reng tawh ni awm tak a ni ka’n en (melh) ve chuan hmuhnawm min tih hmel tak hian minlo thlir reng mai a. Ka rilru-ah thildang a awm tawh lo, kan tuichawi zana ka hmangaihna kha a lokir lehta niber hian ka hria. Duhthawh taka kan mit leh mit kan han in tawntir chu ka tuiral hi a ni ber mai.

A va nuam em! Ni e, khami ‘hun’ atang khan kan induhna alo pung a, kan inhmangaihna chu ahma aia nasain chhem alhin a lo awm leh ta. Inkhawm kan bang a, ka thiante ho bula kal lovin ka ‘d’ (thar) chu ka zawng nghal vat vat a. Kan han inhmu chu inzah tak chungin kan in chibaia. Chutah chuan ka lenna tur tuma zawh ka ngailo keimahah hian a chiang vek tawh. An inlam panin kan haw dun a, rawn leng rawh a tih hi ka nghak phal tawhlo, ka rawn leng dawn aw tiin ka zawt nghal a. Ani pawhin lawmtakin alo ‘aw’ a, a tawi zawngin sawi ila kan in hmangaihna chu kan ‘rewind’ leh ta a ni.

Lal ISUA nen in chhingmit a intawng ve tawh em?

He thu ka ziah chhan ber chu Lal ISUA nen kan chhingmit hi a intawng ve tawh em? tih hi a ni. Peter-a phatsantu tenawm pawh vawi thum a phat hnua Lal Isua’n a mita a enkalh chuan a tuiral zawih zawih mai. Tirhkoh Paula pawh Lal Isua, a tihduhdah thin eng chuan a chhun thlu a, a thinlung chu a va danglam nasa tehreng em.

Chhiartu duhtak, kan mit leh Lal Isua mit a intawn meuh hi chuan khawiah nge kan kal anga, enge kan tih ang tih hi zawh kanla ngai dawn em ni? Keipawh kalo theihnghilh tawh, mahse chiang tak maia kan chhingmit a intawn avangin ka ‘d’ hlui kha ka ‘d’ thar alo ni leh ta a. An run sang kaiin nauang kan nui za leh theita a ni. Lal Isua nen in intawn hun chuan rinhlelhnain I khat tawh lovang a, Amah ring chungin Amah chu I theihna zawng zawng nen i fak tawh zawk ang.

ZAWHNA KA ZAWT ANG CHE

Zawhna ka zawt ang che. Uluk takin ngaihtuah la min chhang dawn nia. Chhanna rintlak ka beisei a ni, chumi atan chuan i ngaihtuahna fimtak kha hmang ang che. I thiante leh i nupui leh i pasalte ngaihdan leh an pawmdan ka beisei lova, nangma thinlung chhungril atanga chhuak chhanna a ni ka duh ni. Rev Liangkhaia khan a rilru chhungrilah he zawhna hi a pai reng thin a ni ang hlathu hmingin a lo ziak chhuak a. Vawiinah hian he thu hi min zawt nawn a ni.

Ka zawhna chu hei hi - Engtinnge Pathian Fa mal chu misual ka tan alo thih?
Zingni chhuak engmawi leh boruak thianghlim min pek zozai avanga kuna chibai buk reng tur kan nih piahlamah Ama Fapa meuh ui hauh lova thihna kutvawt tuar tura chhantu neilova a tualthih dan hi thumak tak a va ni em!

Lunghriam hnam hunlai atangin mihringte hian thir (metal)-a siam hmanrua hmanna chang kanlo hria a, kan nundan pawhin hma a sawn chak hle mai. Tunhmaa kan chhehvela thil awm mai mai thin te chu awmze nei zawkin an awm a ni tih kan lo hre mek zel bawk a. Thil reng reng hi amah maia awm lovin siamtu emaw awmtirtu emaw an awm ngei niin mi tamtakin an ring a, chik tak leh dilchhut takin chung thilte chu an chhui a, an hriatthiamloh leh an hriat loh te hriatbelh an tum a. Chu chuan zawhna tamtak a rawn hring chhuak a ni. Hriatthiam ngailoh leh a ngaihna an hriatloh zawhna an han zawh changa dik taka chhangtu te chu ‘mifing’ tiin mi ngaihsan an hlawh a. Khua leh tuiah pawh dinhmun tha changin khawtlang mimir zahkai anlo ni thin.

Lui leh tuifinriata inkal pawh nan hmasang atangin Lawngleng an lo siam chhuak a. Tangkai taka hman mai anla duhtawk lo cheu! Zawhna lo awm ta chu engvanga lawngleng hi tuia lang thei nge a ni tih hi? He zawhna khirhkhan tak mai hi Archimedes-a chuan Archimedes principle buoyancy hmangin zawhna te alo chhang tawh a. Hriatna alo pung a, theihna a lo sang zel bawk. Engatinge van lamah thil kan vawr a leilamah kher alo tlak thlak, phei zawngte emaw a nihloh leh van lamah awm reng mai awm. Mahse Isaac Newton-a chuan law of universal gravitation hmangin he zawhna hi alo chhang tawh bawk a ni.

Thiamna alo san zel avangin mihringte hian hriatloh neih kan duh lova, chhan theihloh zawhna a awm tur a nilo tiin sum leh pai leh tha tamtak sengin chung thuruk inthup te zawngin kan hmanhlel a ni. Khawvel pawh a zau sawt e! Kan Lal Isua hunlaia khawvel chu Rom empire leh a chhehvel chauh a ni a. Tlawhpawhloh ram te daidar turin Christopher Columbus-a te, Vasco da Gama te an hmanhlel a khawvel pawh a zau sawt e. Vansang lamah lah thla leh arsi te chu kan inpui a lo ni ta. Thlaa lawn te kan intihhmuh a, van thengrenga zin te chu infiamna hautak takah alo chang ta bawk a. Hmuhhmaih a awmloh nan leh chhantheihloh zawhna awmlo turin kan khawlthaber leh operator thaber kan hmang a. Second reilo te thil lo lang zawk pawh lo hrechiang a lo hrilhfiah nghal zung zung thei turin kan hmanhlel a ni.

Thiamna in tawp chin a neih miau loh a vangin mi thenkhatin kan hna zawng zawng chanve min thawhsak theitu an tih mai ‘computer’ te pawhin kan inchhung lum a rawn rap ve a. Google hmangin kan hriatloh kan hria a, FB in kan hmuhloh min hmuhtir bawk. Khawvelah hian chhantheihloh zawhna zawhtur a awm tawhlo a ni ber mai.
Enga tinge ? Eng vanginnge ? Eng aiah maw ? Khawvel leh a chhunga thil awm zawng zawng siamtu in hreawmna sawi hleih theihloh tuar tura Ama Fapa A rawn tirh mai le ? Khawvel finna hian chhang thei dawn ni ila kum sanghnih a chuang tawh, chhang thei sela chu kan khawvel mifing te pawhin an chhang tawh tur a ni. Mahse he thuruk hi khawvel finna atanga chhan chi a ni lo.

Nie, Amah anga A siam, a duat, chanvo tha engkim a pek, mahse A thuawih leh silote tan heti em em a A thilphalna hi mihring tawnga sawifiah mai theih a nilo reng a ni. Lehkhabua ziak zawhsen a nilova, mihring dam chhung kum 100 chhung hian sawi zawh hman pawh a ni love.

Rev Liangkhaia chuan hei hi a hrechiang a ‘thumak ka sawinin theihloh chu Kalvari chanchin a ni’ a ti tawp mai. Ka LALPA sualna neilo misualte zinga an khaikan ve mai nachhan hi thumak tak chu a ni. He ‘thumak’ hi ‘PATHIAN HMANGAIHNA’ a ni a, chu chu Amah ringtute apiangin an hrethiam a, he zawhna hi an ‘nunin’ an chhanglet thin a ni.

1906 Mairang Harhna leh Mizoram

Ni 4 April (Thawhtanni) kha Mizoram-a harhna lothlen champha a ni a. Mizoram harhna lothlen dan ngaihnawm tak Rev SR Lalkailuaia ziak hi lo chhiar ang u.

Kan rama Kristianna rawnluh tirh lai vel a Pu Zosaphluia te, Pu Zosapthara te leh Pu Buanga ten Wales ram leh Khasi ramah harhna a thleng tih an hriat khan Mizoram-a thleng ve turin an duh em em mai a. A lothlen ve theih ngeina tur a nih beiseiin March 15-18, 1906-a Mairang-a Khasi Assembly awm chhim turin Chawnga, Khuma, Thanga, Vanchhunga, Pawngi, Thankungi, Siniboni (Khasi) leh chhimlam atangin Thankunga, Pasina leh Zathanga te sawmin Zosapte hian an hruai a.

Sairang atangin an chhuak a, Syhlet-ah Pathianni an cham a. A tukah Theiria-ah riakin a tuk lehah Cherrapunji veng pakhat, Nongsolia-ah an riak a. An thlen inah chuan zaia kutbeng leh phar duai duai te an hmu a, an hrethiamlova, uan thiltihah an ngai a mak an ti hle a ni. A tuka an han kal leh chu kawtchhuahah Khasi ho Inkhawmpui kal tur harhna chang rui hlim em em mai nen an kal hova. Sohravim khua an thleng a, kawng sira in pakhatah an lo zai a an khur bawk a, an kalpuite chu an lut ve mai a, Mizo te chuan nghah chi niin an hre lova an kal san ta a. Luite pakhat anva thlenga chaw an fak ta a ni. An chawfak lai chuan Khasi-ho chuan an rawn umpha leh a an la khur dur dur hlawm a. Thanga chuan, “Enge maw in hlauhva in khurh in khurh hlawm mai le ?” a tita chawt a. Anni chuan, “ Engmah kan hlau love, PATHIAN in thil ropuitak min tihsak a, kan lawm a kan khur a nih hi” an ti a. Chutah chuan thil awmzia an hreve ta deuhva. An kal zel a, Mawhphlang khua an thleng a, an riak ta a.

Mawphlang khuaah chuan zanah hlim takin an Inkhawm a, a tukah chuan Mairang khua chu an thlengta a ni. Pu Syney Hama Inah an thleng a. Tlaia tawngtai Inkhawma an kal chuan Sawrkar Officer leh mi ropui taktak inkhawm an hmuh chuan an awt hle a. Sawrkar hnathawk hmasa Suaka, a hnua Durtlang Lal ni tate chu an hrechhuak rum rum a ni. A tuka chawhma Inkhawmah chuan Pulpit bulah an thut ho tir a. Inkhawm chu an zaitui hle mai a. Thanga chuan hnung lamah tap niawm tak thawm a hria a, ahan lehhawi a Khuma chu a tap alo ni a. “Tunah chuan Mizoram-ah harhna a lo thleng ve ta” a ti hial a ni. Tlai lamah tualmei an ainaah an zai laiin Vanchhunga chu a khawng ta tlat mai a a kut te a hum ruh a. An buaipui lai chuan “Aw LALPA, ka rinhlelhna tlang aia lian chu i labo ta a, ka lawm e” tiin a rawn au chhuak a, a khawng chu a reh leh ta a. T umkhat pawh Thanga chu a hit ta mup mai a, tlu mai dawna a inhriatin a insiam fel a,harhna a zem ve deuhin a inhre bawk. Tichuan, Mizo zinga harhna chang hmasa ber chu Khuma a ni a, a dawtah Vanchhunga, a pathumna chu Thanga a ni ang.Inkhawmpui tiak dawn Pathianni tlaiah Mual Inkhawmah a bik takin Mizo lokalte leh Mizoram pumtan harhna dilin tawngtai rual an rawt a, chuta an tawngtai chu an tuiin an thawm a na hle an ti. Mizo-ho pawh athen chu an tap a, an au ve viau a ni. Hlim taka zana an Inkhawm leh hnu chuan Inkhawmpui chu a tiak ta a ni.

Inkhawmpui tukah chuan an hawng ta a. Sohvarim an thlen chuan an kalpuite chuan Thlarauvin kal zel aphal lo tiin an riak ta a. A tuk chawhma pawh chu an la cham a, chawhnuah an chhuak a Cherrapunji khuaah an riak leh ta a. Zanah an Inkhawm a, chutah chuan Pasina a lam ve ta zak zak mai a. Ani hi Mizo zinga harhna avang Thlarauva lam hmasa ber a niin a lang. Cherrapunji an chhuahsan a an thlen In pa chuan an luchungah kut nghatin a tawngtai theuh a. A tawngtaizawh chuan, “Mi pakhat tih chauhlo chu in faikim vek e. In kal a, Thlarau Thianghlimin a kalpui ang che u a. Setanah pawhin a zui dawn che u a ni. Fimkhur hle ula, in fimkhur loh chuan buaina in tawk ang” a ti a, a in chibaia, an kal ta a.

Silchar an lo thlen chuan an inbe duh lo ta tlat hlawma, an tum deuh hmur hlawm mai a. An lo haw zel a,Neihbawi Bangla an lo thlen chuan Thanga chuan an awmdan chu sawifiah turin a ti ta hlawm a, A engamahchu sawi tur an nei hlawm ta lo va. Tichuan, an fimkhurloh vanga anchungah he thil hi thlengah an ngai a, an loharh ta hlawm a, Setana tihbuaina lakah an fihlim tâk avangin an lawm hle a, Pathian hnenah lawmthu sawiin an tawngtai ta a ni.

April 4, 1906 (Nilaini) chawhnu lamah chuanChaltlang-a tuna Bethel lungphunna hmun hi an lo thleng a, an chawl a a mal te tein an tawngtai a. An tawngtai zawh chuan Pu Zathanga chuan, “ A hmasa ber a tawngtai khan Vansangah meialh thlawk ka hmu a, tawngtai apiangin a lo hniam tial tial a a hnuhnungber a tawngtai khan kan zingah alo awm ta a ni ang ka hmu ta hauhlo” a ti a. Thlarau Thianghlimin a luah ta ngeiin an inngai a,zai chung hlirin an kal leh ta a. Tlai dar ruk velah Mission veng an thlenga, an thlen zan atanga Pathianni thlengin thil thar engmah a thleng zui lo.

April 9, 1906 (Thawhtanni)-ah chuan Pu Zosaphluia lopuan tawh angin chhim lam palai hawng tur thlah Inkhawm chu an nei ta a. An han zai chu an zai tawp thei ta hauh lova, an zai ta tluk tluk mai a. Chutah Pi Hlunziki chuan a sual a rawn puang a, tawngtaipui a ngen nghal a chu chuan mipui a thawng lehzual. “ Vandar vaw ring rawh u, vawiinah kan lawm ang, mi pakhatin a sual sim ta” tih hla an sa zui a. Zai nen, sual puan nen, tawngtai nen an ri ta mup mup mai a. Zing lama an Inkhawm kha tlai dar li(4)-ah an bang thei ta chauh a ni.

Hei hi Mizorama harhna nawlpui a lo thlenna bul chua ni. Pu Zosaphluia chuan,“Van atangin Thlarau Thianghlim meialh chu kan zingah a lo thleng ta a ni” a ti a. Reiloteah Mizoram khaw hrang hrang Muthi, Sakawrtuichhun, Maite, Ngopa, Khandaih, saipum, Pawlrang, Bunghmun leh Zokhawsangah te a thleng ve nghal a ni.
He harhna hian Chanchin tha hrila thahnemngaihna thar a tuh a, an kalna leh thawhna apiangah Chanchintha an hril zel a, an sawi mawlh mawlh a ni. A hmaa kumkhatah 10 pawha pung ngai mang lo kha, a za telin kum tin an lo pung ta a ni.

Tin, mirethei leh harsate hnenah chauh ni lovin lal leh milianho zingah pawh ringtu an lo awm ta. Lal, kristian-a inpe hmasate chu Vanchhunga, Kolasib Lal leh Hrangvunga, Bunghmun Lal te an ni. Sawrkar hnathawk hmasa Suaka te pawh Kristian niin mi tangkai tak an ni ta.

He harhna hian Mizoram-ah chi nung a tuh a, 1913,1918, 1930 ah te a runpui lo thleng lehin, tun thlengin harhna hian kan ram hi min awm chilh ta a ni.

Vision City building thlalak

A dinglama mi khi Multipurpose Hall (Kitchen & Dining Hall) leh Meeting neihna atan kan hmang a, pakhat zawk khi riahna room a ni.



Meeting Hall



Hall office tura kan duan, a bang lehlam siam tawh



Multipurpose Hall Front View



Landscaping ka siam ve a nih khi



Multipurpose Verandah-ah thuthhleng tur an siam mek



Chaw dawhna (pantry) hi duh huna hawn theih turin partition wall a awm



Kitchen chhung



Front View of Multipurpose Hall (A vaia lang thei)



Riahna tur building

Pathian zarah kan building sa pawh kan chhunzawm vel zel e.